суббота, 13 апреля 2013 г.

Գարեգին Նժդեհ.խոսքեր /2/


Ազգերի հանճարը ստեղծագործ,իսկ նրա արտահայտությունը հորդաբուխ է լինում միայն բացարձակ անկախության մթնոլորտում:Ահա թե ինչու մարդկությանն ավելի օգտակար լինելու համար ժողովուրդները պիտի լինեն ինքնիշխանորեն ազատ և անկախ:

Անկախությունը,անկախ Հայրենիքն իրավունք լինելուց առաջ պարտականություն է,որից խուսափող ժողովուրդները կորցնում են իրենց բարոյական գոյության իրավունքը:

Չկա հայրենասիրություն-չկա հոգևոր Հայրենիք:Եղածը լոկ աշխարհագրական սահմաններն են:

Չկա հրեշ,որ կարողանար գերազանցել անհայրենասերին,որ հոգեբանորեն անտարբեր է դեպի երկիրն ու ժողովուրդը:

Անհայրենասեր ժողովուրդը,եթե այսօր չէ,անհայրենիք կդառնա վաղը:

Սուրբ,հերոս,բարեգործ-սրանք կենդանի անհեթեթություններ են մեր կյանքում,եթե միաժամանակ հայրենասեր և արի չեն:Անհայրենասեր հայ-այդ դժբախտը նման է այն թագավորին,որի մասին պատմությունն ասում է հեգնանքով.«Միայն գահ բարձրացավ»:

Ժողովուրդների մեջ մի ստոր տարր կա`անհայրենասերները:

Անհայրենասեր ժողովուրդ,ասել է`անիդեալ և աննպատակ ժողովուրդ,որ իրենից ներկայացնում է մի տրցակ,բայց ոչ թե մի մարմին,«անհատների փոշի»,բայց ոչ գրանիտե ժայռ,որպիսին պիտի լինեն ժողովուրդները`միջազգային արնոտ փոթորիկներից պաշտպանվելու համար:

Հերիք է,որ մի ժողովուրդ դառնա անհայրենասեր,որպեսզի համարվի պատրաստի որս, և նրա երկիրը բաժանվի իր հարևանների միջև:

Ապագան վտանգված ժողովուրդը,ինչպիսին է մերը,նորանոր աղետներից խուսափելու համար մի հատիկ միջոց ունի-բարձր հայրենասիրությունը,այնպիսին,որով քաղցրանում են մեր հավաքական թե անձնական ցավերը:

Հայրենասիրությունը ժողովուրդներին ներշնչում է առաքինություններ,որոնց շնորհիվ նրանք դառնում են և մնում ապահով ու հարգված:

Գինետնային հայրենասիրությունը,որ բավականին դավանողներ ունի մեր մեջ,այնքան էլ հեռու չէ անհայրենասիրությունից:

Դատապարտելի է նաև պայմանական հայրենասիրությունը:Հայրենիքը պետք է սիրել անկախ իր քաղաքական ռեժիմից,ինչպես նաև անկախ մեր քաղաքական համոզմունքներից:

Կան այնպիսիները,որոնք իբրև թե սիրում են Հայրենիքը,բայց որովհետև սիրում են և մարդկությունը,գործնականում մնում են անտարբեր թե դեպի մեկը,թե դեպի մյուսը:Սրանք նույնպես հակազգային ուժ են:Սխալվում են ազգային պարտականության դասալիքները`կեղծ ընկերավարականը,համայնավարը,անիշխանականը:

Հայրենասեր լինել չի նշանակում օտար ժողովուրդների թշնամին լինել:Դա նշանակում է,թե այդ օտարները կարող են մեր թշնամին դառնալ:

Հզորանալու մի իմաստուն ճիգ է հայրենասիրությունը:

Комментариев нет:

Отправить комментарий

Related Posts Plugin for WordPress, Blogger...